【Emily】異世界抒畢業迷惘 城大生動畫得獎

動畫Pink Pupil講述一個少女睇到「異世界生物」，佢有日遇上一隻怪貓，之後一齊前往「異世界」生活。

【明報專訊】都會大學今個禮拜二首辦「世界大學動畫獎」頒獎禮，城大畢業生陳嘉琳憑作品Pink Pupil獲頒「香港新一代動畫人獎」。佢製作咗一段幾分鐘嘅動畫，講述一個少女睇到「異世界生物」，有日放學路過垃圾站，執咗隻怪貓返屋企，貓貓幫手將「討厭嘅人消除」，佢哋之後去咗「異世界」……

陳同學同Emily講，意念係講一個唔願面對現實嘅少女。佢特登設計咗個「開放式」結局，話冇人知少女同隻貓最終去咗邊，佢一度覺得呢個係唔開心嘅結局，扣連自己準備大學畢業、唔知想去邊嘅心情，但諗諗下亦可以話係圓滿結局，覺得主角自由咁生活落去。佢話製作過程艱辛，感謝好多人幫手畀意見，冇諗過攞獎。被問到今年畢業嘅佢會唔會入行做動畫，佢就講笑話「如果經濟支撐到，咁我先做啦」。

世界大學動畫獎設6個獎，最高榮譽大獎由法國嘅The Shyness of Trees奪得。